Lukaşenko 17-cidir…
Belarus prezidenti Aleksandr Lukaşenko noyabrın 28-də “Heydər Əliyev” ordeni ilə təltif edilib. Novator.az bildirir ki, 2005-ci ildə təsis olunmuş bu ordeni indiyədək dövlət başçısı İlham Əliyev daxil olmaqla 17 nəfər alıb (Azərbaycan prezidentinə orden onun statusuna görə verilir).
“Heydər Əliyev” ordeni alan şəxslərin 12-si əcnəbi siyasətçidir. İlk təltif 2007-ci ildə olub, Fransa prezidenti Jak Şiraka orden verilib.
2008-ci ildə Ukrayna prezidenti Viktor Yuşşenko, 2009-cu ildə Küveyt əmiri şeyx Sabah əl-Əhməd-əl-cabir əs-Sabah, Polşa prezidenti Lex Kaçinski, Latviya prezidenti Valdis Zatlers, 2011-ci ildə Rumıniya prezidenti Trayan Besesku, Bolqarıstan prezidenti Georgi Pırvanov, 2012-ci ildə Tacikistan prezidenti İmaməli Rəhman, 2013-cü ildə Türkiyə prezidenti Abdulla Gül, Ukrayna prezidenti Viktor Yanukoviç, 2014-cü ildə Türkiyə prezidenti Rəcəb Teyyub Ərdoğan orden alıb.
“Heydər Əliyev” ordeni ilə təltif olunan digər şəxslər bunlardır: türkiyəli alim İhsan Doğramacı, musiqiçi Mstislav Rostropoviç, rəssam Tahir Salahov, deputat, Heydər Əliyev Fondunun prezidenti Mehriban Əliyeva.
