362 nəfərin biznes-planı müsbət qiymət alıb
Özünüməşğulluq proqramı üzrə təlim kurslarını bitirən işaxtaran və işsiz vətəndaşların biznes-planlarının növbəti qiymətləndirməsi olub. Əmək və Əhalinin Sosial Müdafiəsi Nazirliyinin məlumatına görə, indiyədək 362 nəfər işaxtaran və işsiz vətəndaşın biznes-planı müsbət qiymətləndirilib.
Son qiymətləndirməyə 8 rayon və şəhər (Saatlı, Göyçay, Kürdəmir, Lerik, Astara, Masallı, Yardımlı, Mingəçevir) üzrə 141 nəfər biznes-plan təqdim edib, onlardan 118-nin biznes-planları keçib.
Özünüməşğulluq proqramı üzrə biznes-planların qiymətləndirilməsinə bu ay başlanıb. Kursları bitirən 532 nəfərdən bu günədək 441-i biznes-planların müdafiəsi prosesində iştirak edib, 24 rayon üzrə 362 nəfərin biznes-planları uğurlu hesab olunub.
Özünüməşğulluq proqramına 1500 nəfər işaxtaran və işsiz vətəndaşın cəlb edilməsi, onların ailə bizneslərinin yaradılması nəzərdə tutulur. Ailə təsərrüfatlarının formalaşdırılması üçün mal və material formasında dəstək işləri aparılacaq.
