Sərkisyanın hesabat məruzəsindən
“2007-2015-ci illərdə Ermənistan iqtisadiyyatı 29,3 faiz artıb”. Novator.az-ın məlumatına görə, Ermənistan prezidenti Serj Sərkisyan lideri olduğu hakim Respublika Partiyasının qurultayında belə deyib. Hesabat məruzəsində qeyd edilib ki, 2006-cı ildə Ermənistanın 985 milyon dollarlıq ixracı olub, 2015-ci ildə isə ixrac 1 milyard 485 milyon dollara çatıb. Sərkisyan 2016-cı ilin 9 ayı ərzində ixracın 1,3 milyard dollara bərabər olduğunu vurğulayıb.
Prezident 2007-2015-ci illərdə ölkədə əməkhaqqının 39,2 faiz artdığını deyib. O bildirib ki, 2007-ci ildə minimum əməkhaqqı 20 min dram olub, hazırda 55 min dramdır. Sərkisyan dövlət sektorunda orta əməkhaqqının 2007-ci ildə 60985 dram olduğunu, 2016-cı ilin 9 ayında 160668 drama çatdığını deyib. Onun sözlərinə görə, bu ilin 9 ayında özəl sektorda orta əməkhaqqı 214169 dram olub və 2007-ci ilin göstəricisini 2,4 dəfə üstələyib.
Ermənistan prezidenti 2007-ci illə müqayisədə ölkədə orta pensiya məbləğinin 3,3 dəfə artdığını qeyd edib.
Respublika Partiyasının qurultayı noyabrın 26-sı Yerevanda keçirilib. Serj Sərkisyan yenidən partiya sədri seçilib. O, Respublika Partiyasına 2007-ci ildən liderlik edir.
Qurultaydakı məruzəsində Sərkisyan Dağlıq Qarabağ münaqişəsinə də toxunub. O deyib ki, münaqişə Dağlıq Qarabağ ermənilərinin öz müqəddəratını təyin etmək hüququ əsasında həll oluna bilər: “Nə qədər ki Dağlıq Qarabağın statusu qeyri-müəyyəndir, heç bir başqa məsələ öz həllini tapa bilməz”.
2008-ci ildən prezident postunu tutan Serj Sərkisyan Azərbaycana qarşı işğalçı müharibənin ən qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən isə Ermənistanın müdafiə naziri olub.
