Hesablama Palatası gələn ilin büdcəsinə nə rəy verib?
Hesablama Palatası 2017-ci ilin dövlət büdcəsi layihəsinə rəy verib. Novator.az-ın məlumatına görə, rəydə qeyd olunur ki, Dünya Bankı gələn il Azərbaycanda ÜDM-in 0,7%, 2018-ci ildə 1,3% artacağını proqnozlaşdırır, Beynəlxalq Valyuta Fondu isə 2017-ci ildə 1,4%, 2018-ci ildə 2,3% artım gözləyir: “Büdcə zərfinə daxil olan məlumatlarda 2017-ci ildə ÜDM-in real artım tempi 1% göstərilir”.
Hesablama Palatası bildirir ki, 2017-ci ildə dövlət büdcəsinin gəlirləri 15 milyard 955 milyon manat nəzərdə tutulur: “Bu, 2015-ci ilin icra göstəricisi ilə müqayisədə 8,8%, 2016-cı ilin proqnoz göstəricisi ilə müqayisədə 5,2% azdır. 2017-ci ildə dövlət büdcəsi gəlirlərinin ÜDM-ə nisbətinin 26 təşkil edəcəyi proqnozlaşdırılır.
Növbəti ildə dövlət büdcəsinin xərcləri 16 milyard 600 milyon manat məbləğində olmaqla 2015-ci ilin icra göstəricisi ilə müqayisədə 6,7%, 2016-cı ilin proqnoz göstəricisi ilə müqayisədə 10,2%, gözlənilən icra göstəricisi ilə müqayisədə 2,4% azdır. Növbəti il üçün dövlət büdcəsinin xərclərinin ÜDM-də xüsusi çəkisinin 27% olması proqnozlaşdırılıb, bu da 2016-cı ilin müvafiq göstəricisi ilə müqayisədə 5 faiz bəndi aşağı göstəricidir” (2017-ci ilin dövlət büdcəsi layihəsinə Hesablama Palatasının rəyi).
Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun 2017-ci il üçün büdcə layihəsinə rəydə qeyd olunur ki, fondun gəlirləri 3,4 milyard manat nəzərdə tutulub: “Fondun növbəti ilə proqnozlaşdırılmış gəlirləri 2015-ci ilin icra göstəricisindən 16,7%, 2016-cı ilin proqnoz göstəricisindən 2,8%, gözlənilən icra göstəricisindən 8,6% çoxdur.
2017-ci ildə fondun xərclərinin 3,4 milyard manat olacağı göstərilir. Həmin vəsait 2015-ci ilin icra göstəricisini 15,8%, 2016-cı ilin proqnoz göstəricisini 2,8%, 2016-cı ilin gözlənilən icra göstəricisini 7,9% qabaqlayır”.
