Ev dustağı olan sabiq nazir mediaya çıxış istəyir
Rusiyanın sabiq iqtisadi inkişaf naziri Aleksey Ulyukayevin vəkili Timofey Qridnyov Moskva Şəhər Məhkəməsinə müraciət edib. Novator.az-ın məlumatına görə, vəkil sabiq nazirin jurnalistlərlə ünsiyyətinə imkan verilməsini istəyir. O, məhkəməyə müraciətində qeyd edib ki, kütləvi informasiya vasitələri sabiq nazirin cinayət işini birtərəfli işıqlandırır: “Xahiş edirəm öz mövqeyini açıqlaması üçün müdafiə etdiyim şəxsə jurnalistlərlə ünsiyyət qurmağa icazə verəsiniz. Onun heç olmasa “Exo Moskvı” radiosuna Cəzaların İcrası Federal Xidməti əməkdaşlarının nəzarəti altında telefonla müsahibə verməsinə imkan yaradılmasını xahiş edirəm”.
Moskva Şəhər Məhkəməsi vəkilin müraciətini təmin etməyib.
Noyabrın 15-də Rusiyanın İstintaq Komitəsi Aleksey Ulyukayevə cinayət işi qaldırıb. O, 2 milyon dollar rüşvət almaqda təqsirli bilinir. İstintaq Komitəsi bəyan edib ki, Aleksey Ulyukayev “Başneft” şirkətinin aksiyalarının alınmasına razılıq vermək üçün “Rosneft” şirkətinin təmsilçilərinə hədə-qorxu gələrək rüşvət tələb edib və 2 milyon dollar alarkən tutulub. Əməliyyatı Federal Təhlükəsizlik Xidməti keçirib.
Prezident Vladimir Putin Aleksey Ulyukayevi nazir postundan çıxarıb. Sabiq nazir haqqında ev dustaqlığı qətimkan tədbiri seçilib.
60 yaşlı Aleksey Ulyukayev iqtisad elmləri doktorudur. İqtisadi inkişaf naziri postunu 2013-cü ildən tuturdu.
