Cəzadan azad olunan 6681 nəfər sosial müavinət alıb
Əmək və Əhalinin Sosial Müdafiəsi Nazirliyi bu ilin yanvar-sentyabr aylarında həbs cəzasından azad edilən 6681 nəfərə birdəfəlik sosial müavinət verib. Həmin şəxslərin hər birinə minimum əməkhaqqının 4 misli qədər, yəni 420 manat məbləğində birdəfəlik pul müavinəti ödənib.
Rəsmi hesabata görə, cəza müddəti başa çatmaq ərəfəsində olan şəxslərə əmək bazarına səmərəli inteqrasiya imkanlarının yaradılması da diqqətdə saxlanıb. Bu məqsədlə Bakının Xətai və Qaradağ rayonlarındakı cəzaçəkmə müəssisələrində cəza müddəti başa çatmaqda olan 62 nəfər üçün əmək bazarının tələblərinə uyğun peşələr üzrə peşə hazırlığı kursları təşkil edilib. Məşğulluq orqanları cəza çəkməkdən azad edilmiş şəxslərin kvota üzrə ayrılmış iş yerlərində məşğulluğunun təmin olunmasına da diqqət yetirir.
Əmək və Əhalinin Sosial Müdafiəsi Nazirliyinin sifarişi ilə Qobustan rayonunda cəza çəkməkdən azad olunmuş şəxslər üçün inşa olunan 50 yerlik Sosial Adaptasiya Mərkəzinin tikintisi işləri davam etdirilir. Mərkəz bu təbəqədən olan insanların hüquqlarının müdafiəsi, onların sosial adaptasiyası, sosial mühitə uyğunlaşdırılması və s. istiqamətdə zəruri tədbirləri həyata keçirəcək.
