Baş nazirin varidatı açıqlanıb
Ermənistanın yeni baş naziri Karen Karapetyanın parlamentin etika komitəsinə təqdim etdiyi gəlir bəyannaməsinin detalları məlum olub. Novator.az-ın məlumatına görə, baş nazir postuna təsdiq olunarkən verdiyi bəyannamədə Karen Karapetyan 4 mənzilinin, 1 bağ evinin olduğunu qeyd edib.
Karen Karapetyan bəyannamədə 2 avtomobilinin (“Lexus LX 470”, “Toyota Land Cruiser 100”) və ümumi dəyəri 16 min 700 dollar olan 3 qol saatına sahib olduğunu yazıb.
Baş nazir 50 milyon dram (104 min dollar) məbləğində qiymətli kağızları, 3 milyon 700 min dolları, 850 min avrosu, 120 milyon dramı (250 450 dollar), 55 milyon rublu olduğunu bəyan edib.
Ümumi gəlirlərini baş nazir 32 milyon 898 min dram (69 min dollara yaxın) və 70 milyon 850 min rubl həcmində göstərib.
Karen Karapetyan bu il sentyabrın 13-dən baş nazirdir. O, 1963-cü ildə Azərbaycanın Dağlıq Qarabağ bölgəsində, Stepanakert şəhərində doğulub. İqtisad elmləri doktorudur. Uzun illər energetika sahəsində rəhbər vəzifələrdə çalışıb, “Qazprom-Ermənistan” şirkətinə rəhbərlik edib. 2010-2011-ci illərdə Yerevanın meri olub.
