“Qarabağ”ın qrupunda mümkün variantlar
Novator.az Azərbaycanın “Qarabağ” komandasının yarışdığı UEFA Avropa Liqasının J qrupunda turnir cədvəlinə nəzər salaraq mümkün variantlar üzrə hesablama aparıb.
Reqlamentə görə, növbəti mərhələyə – 1/16 finala qrupda 1-ci və 2-ci yerləri tutan komandalar adlayır. Dekabrın 8-də keçiriləcək 6-cı – sonuncu tur ərəfəsində İtaliyanın “Fiorentina” komandası 10 xal yığıb və 1-ci yerdə gedir.
“Qarabağ” və Yunanıstanın PAOK komandalarının 7 xalı var. Öz aralarındakı oyunlarda üstünlüyə görə “Qarabağ” PAOK-u geridə qoyur. Azərbaycan komandası 2-ci, yunanlar 3-cü pillədədir.
Çexiyanın “Slovan” komandası 4 xalla sonuncu – 4-cü yerdədir.
J qrupunda indiyə qədər keçirilmiş oyunlar belə nəticələnib:
“Qarabağ” – “Slovan” 2:2
PAOK – “Fiorentina” 0:0
“Fiorentina” – “Qarabağ” 5:1
“Slovan” – PAOK 1:2
“Qarabağ” – PAOK 2:0
“Slovan” – “Fiorentina” 1:3
“Fiorentina” – “Slovan” 3:0
PAOK – “Qarabağ” 0:1
“Fiorentina” – PAOK 2:3
“Slovan” – “Qarabağ” 3:0.
Son oyun günü “Qarabağ” “Fiorentina”nı, PAOK “Slovan”ı qəbul edir.
“Qarabağ” “Fiorentina” üzərində qələbə qazansa, PAOK-un “Slovan”la görüşünün nəticəsindən asılı olmayaraq ən azı 2-ci yeri tutaraq 1/16 finala keçir. Əgər PAOK da “Slovan”ı udsa, Azərbaycan, italyan və yunan komandalarının xalları bərabərləşir (10 xal). Bu halda üç klubun öz aralarındakı oyunların nəticələrinə görə “Qarabağ” qrupda 1-ci, PAOK 2-ci yeri tutacaq.
“Qarabağ” – “Fiorentina” və PAOK – “Slovan” oyunlarının hər ikisinin heç-heçə bitməsi də Azərbaycan komandasının xeyrinə olacaq. “Qarabağ” onunla eyni xala malik PAOK-u şəxsi oyunlardakı üstünlüyə görə qabaqlayıb 2-ci yeri tutacaq.
“Qarabağ”ın heç-heçəsi və PAOK-un qələbəsi isə Azərbaycan komandasını qrupda saxlayacaq.
Son turda xal almayacağı təqdirdə “Qarabağ” bütün hallarda ələnir. Yekunda həm “Qarabağ”, həm PAOK, həm də “Slovan”ın 7 xalı olsa, üç komandanın öz aralarındakı oyunların nəticələrinə görə qrupda 2-ci yeri Çexiya təmsilçisi tutacaq.
