Özbəkistanda 23 ilin siyasi məhbusu azadlığa çıxdı
Özbəkistanda 23 ildir həbsxanada saxlanan siyasi məhbus Səməndər Kukanov azadlığa çıxıb.
Novator.az xəbər verir ki, Səməndər Kukanov tutulanda Özbəkistan parlamentinin – Ali Sovetin deputatı olub. Onu 1992-ci ilin yayında dövlət təhlükəsizlik orqanının əməkdaşları həbs ediblər. Deputat müxalif Ərk Partiyasını maliyyələşdirməkdə, iqtisadi cinayətlərdə təqsirli bilinib.
Səməndər Kukanov həbsdən əvvəl
Ərk Partiyası İslam Kərimov rejiminə qarşı çıxan əsas siyasi qüvvə olub. Bu partiyanın rəhbərləri çoxdan ölkəni tərk ediblər.
Səməndər Kukanovun azadlığa buraxılması Özbəkistana 1989-cu ildən rəhbərlik edən İslam Kərimovun ölümündən sonraya təsadüf edir.
Prezident İslam Kərimov 2016-cı il sentyabrın 2-də dünyasını dəyişib. Sentyabrın 8-də baş nazir Şövkət Mirziyayev dövlət başçısı səlahiyyətlərinə yiyələnib.
Səməndər Kukanov indi
Dekabrın 4-də Özbəkistanda növbədənkənar prezident seçkisi olacaq.
Səməndər Kukanov tutulanda 49 yaşı olub. İndi onun 72 yaşı var.
Kukanov noyabrın 24-də azadlığa çıxıb. Məlumatlara görə, o, şərti azadlığa buraxılıb və 1 il polis nəzarətində olacaq.
Kukanov son vaxtlar Zərəfşan həbsxanasında cəza çəkirdi.
Səməndər Kukanova 20 il həbs verilmişdi. Cəza müddəti başa çatsa da, həbsxana rejimini pozması kimi bəhanələrlə onun həbsi uzadılırdı.
