Nazarbayev paytaxta onun adının verilməsi ideyasını rədd etdi
Qazaxıstan prezidenti Nursultan Nazarbayev ölkənin paytaxtına onun adının verilməsi ideyasını rədd edib.
Novator.az-ın məlumatına görə, Nazarbayev paytaxt Astananın adının dəyişdirilməsi təkliflərinə münasibətini “Rossiya 24” kanalına müsahibəsində açıqlayıb. O, ad dəyişikliyinə ehtiyac görmədiyini vurğulayıb: “Hara gedirsən hamı Astananı tanıyır. Astana brenddir və onun adının dəyişdirilməsinə heç bir ehtiyac yoxdur. Mən belə bir dəyişikliyə heç bir zərurət görmürəm”.
Astanaya prezidentin adının verilməsi, yaxud paytaxtın adında prezidentin adının əks olunması təkliflərini Qazaxıstan parlamentinin bəzi deputatları irəli sürüblər.
Noyabrın 24-də parlamentin yuxarı palatasının iqtisadi siyasət və sahibkarlıq komitəsinin sədri Əsgər Beysenbayev jurnalistlərə deyib ki, təkliflər arasında Nazarbayev, Nursultan və Nur-Astana variantları üstünlük təşkil edir. Əsgər Beysenbayev paytaxtın adının dəyişdirilməsi ilə bağlı təkliflərin yaxın vaxtda müzakirə olunacağını vurğulayıb.
76 yaşlı Nursultan Nazarbayev Qazaxıstanın ilk prezidentidir. O, Qazaxıstana sovet dövründən – 1989-cu ildən rəhbərlik edir. 1990-cı ildən prezidentdir.
Qazaxıstan dövlət müstəqilliyini 1991-ci il dekabrın 16-da elan edib.
Paytaxtın Almatıdan Astanaya köçürülməsi də Nazarbayevin rəhbərliyi dövründə – 1998-ci ildə baş verib. İndiki paytaxta Astana adını elə Nazarbayev özü qoyub. Şəhərin adı paytaxt salınana qədər Akmola olub.
