Almaniya Azərbaycana nə qədər vəsait qoyub?
Azərbaycanda 169 alman şirkəti fəaliyyət göstərir. Economy.gov.az-ın məlumatına görə, Ticarət və İnvestisiyalar üzrə Azərbaycan-Almaniya yüksək səviyyəli İşçi Qrupun noyabrın 24-ü Bakıda keçirilən 6-cı iclasında belə deyilib. İclasda Azərbaycan və Almaniya arasında iqtisadi-ticarət əlaqələrinin vəziyyəti, investisiya, sənaye, turizm, enerji, neft-qaz, təhsil, biznesin idarə edilməsi sahəsində layihələrin icrası, ətraf mühitin mühafizəsi, Azərbaycan məhsullarının Almaniya bazarına ixracı məsələləri müzakirə olunub.
İqtisadiyyat Nazirliyi Aparatının rəhbəri, İşçi Qrupun həmsədri Samir Vəliyev bildirib ki, iki ölkə arasında siyasi əlaqələrin səviyyəsi iqtisadi əməkdaşlığın genişləndirilməsi üçün əlverişli imkanlar yaradır. O qeyd edib ki, Azərbaycanda 169 alman şirkəti fəaliyyət göstərir: “Almaniya əsas kapitala 488,3 milyon ABŞ dolları, o cümlədən qeyri-neft sektoruna 405,4 milyon dollar həcmində investisiya qoyub. Almaniya şirkətləri ölkəmizdə həyata keçirilən layihələrdə podratçı kimi də fəal iştirak edirlər. Ticarət əlaqələri də ölkələrimiz arasında əməkdaşlığın vacib istiqamətlərindəndir. Sumqayıt Kimya Sənaye Parkında yeni tikilən peşə məktəbində alman modelində peşə təhsilinin yaradılması üzrə iş davam edir. Menecer təlimi sahəsində əməkdaşlıq proqramı çərçivəsində 2009-2016-cı illərdə 300-ə yaxın sahibkar və gənc menecer Almaniyada ixtisasartırma kursu keçib”.
Ticarət və İnvestisiyalar üzrə Azərbaycan-Almaniya Yüksək Səviyyəli İşçi Qrupu İqtisadiyyat Nazirliyi ilə Almaniya Federal İqtisadi Məsələlər və Enerji Nazirliyi arasında 2011-ci ildə imzalanmış memoranduma əsasən yaradılıb.
