Dərmanlara nəzarəti gücləndirən qanun qüvvəyə mindi
Prezident İlham Əliyev “Dərman vasitələri haqqında” qanuna dəyişiklikləri imzalayıb. Novator.az-ın məlumatına görə, qanuna ekvivalent dərman vasitələri, oxşar dərman vasitələri və bioloji fəallığa malik qida əlavələri adlı yeni anlayışlar əlavə edilib.
Əsas yeniliyə əsasən, dövlət qeydiyyatına alınmış dərman vasitələrinin qiymətləri tənzimlənmədən satışı və ya tənzimlənən qiymətlərdən fərqli qiymətlərlə satılması (dövlət satınalmaları zamanı və ya tibb müəssisələrinə təklif edilən topdansatış qiymətlərdən aşağı qiymətlər istisna olmaqla) qadağandır. Qanunun bu tələbinin pozulmasına görə bir il ərzində üç dəfə məsuliyyətə cəlb olunmuş hüquqi və fiziki şəxslərin lisenziyası altı ayadək müddətə dayandırılır.
Qanunun yeni tələbinə görə, dərman vasitələrinin istehsalçıları, xarici istehsalçıların yerli nümayəndəlikləri (filialları) və ya onların müvəkkil etdikləri şəxslər dövlət qeydiyyatına alınmış dərman vasitələrinin qiymətlərinin tənzimlənməsi məqsədi ilə bəyannamələri, hesabat sənədlərini və zəruri məlumatları Səhiyyə Nazirliyinə təqdim etməyə borcludurlar.
Bioloji fəallığa malik qida əlavələrini orqanizmin gücləndirilməsi, qidanın zənginləşdirilməsi məqsədi ilə həkim tövsiyə edə bilər, lakin bu əlavələr xəstəliklərin qarşısının alınması və ya müalicəsi məqsədi ilə təyin olunan dərman vasitələrini əvəz etmir. Bioloji fəallığa malik qida əlavələrinin həkim reseptinə yazılması qadağandır.
Bioloji fəallığa malik qida əlavələri dərman vasitəsi ilə eyni tərkibli ola bilməz. Səhiyyə Nazirliyi bunu müəyyən etmək məqsədi ilə bioloji fəallığa malik qida əlavələrini ekspertizadan keçirir.
Bioloji fəallığa malik qida əlavələrinin üzərində və onların istifadəsi təlimatlarında (içlik vərəqlərində) “dərman vasitəsi deyil” sözləri yazılmalıdır. Qida əlavələrinin reklamında onların dərman vasitəsi olmadığı haqqında məlumat verilməlidir.
