Özəlləşdirməyə dair yeni statistika
Əmlak Məsələləri Dövlət Komitəsi noyabrın 23-ü Bakıda “Daşınmaz əmlak, özəlləşdirmə və investisiyalar” mövzusunda konfrans keçirib. Rəsmi məlumata görə, konfransda çıxış edən Əmlak Məsələləri Dövlət Komitəsinin sədr müavini Rafiq Cəlilov deyib ki, indiyədək özəlləşdirmə prosesində sənaye, ticarət, nəqliyyat, rabitə və digər xidmət sahələrində 47 minə yaxın kiçik dövlət müəssisə və obyekti, qeyri-yaşayış sahəsi və nəqliyyat vasitəsi xüsusi mülkiyyətə verilib, 1600-ə yaxın orta və iri müəssisə səhmdar cəmiyyətlərinə çevrilərək səhmləri özəlləşdirilib.
Komitə rəsmisi deyib ki, xarici investorların da iştirak etdiyi investisiya müsabiqələri vasitəsilə özəlləşdirmə nəticəsində ölkə iqtisadiyyatına təxminən 1,1 milyard ABŞ dolları məbləğində investisiyalar yatırılıb.
Azərbaycanda özəlləşdirmə 1996-cı ildən başlayıb.
