Yaşayış minimumu: alternativ hesablama aparılıb
Ekspert Qubad İbadoğlu İqtisadi Tədqiqatlar Mərkəzinin yaşayış minimumu haqqında hesablamasını təqdim edib. Novator.az-ın məlumatına görə, hesablamada göstərilir ki, oktyabr ayında yaşayış minimumu əmək qabiliyyətli əhali üçün 253,4 manat, pensiyaçılar üçün 199,9 manat, uşaqlar üçün 259,9 manat olub.
İqtisadçı bildirir ki, hesablama Nazirlər Kabinetinin qərarı ilə müəyyən edilən minimum istehlak səbətinə əsaslanır: “2017-ci il yanvarın 1-dən yaşayış minimumunu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat müəyyən etmək nəzərdə tutulur. İqtisadi Tədqiqatlar Mərkəzinin ekspertləri rəsmi rəqəmlərin reallığını yoxlamaq üçün Nazirlər Kabinetinin 6 iyun 2014-cü il qərarı ilə təsdiq edilmiş minimum istehlak səbətinin tərkibinə daxil olan ərzaq, qeyri-ərzaq və xidmətlər üzrə yaşayış minimumunun dəyərini hesablayıb. Ötən ayın qiymətləri əsasında aparılan alternativ hesablamalara görə, yaşayış minimumunun dəyəri əmək qabiliyyətli əhali üçün 253,4 manat, pensiyaçılar üçün 199,9 manat, uşaqlar üçün 259,9 manat olub.
Oktyabra olan yaşayış minimumu növbəti il üçün nəzərdə tutulan rəsmi dəyərdən fərqlənir – əmək qabiliyyətli əhali qrupu üzrə 88,9 manat və ya 35,1 faiz, pensiyaçılar qrupu üzrə 69,7 manat və ya 34,9 faiz, uşaqlar üzrə 123,3 manat və ya 47,5 faiz çoxdur. Hesablamalar arasında daha böyük kənarlaşma, iki dəfəyə yaxın fərq uşaqlar üçün yaşayış minimumunun dəyərində qeydə alınıb. Uşaqlar üçün yaşayış minimumunun dəyərinin yuxarı olmasının başlıca səbəbi onların qida və geyim məhsullarının bahalığı ilə bağlıdır.
İqtisadi Tədqiqatlar Mərkəzinin apardığı hesablamalar göstərib ki, ərzaq məhsullarına yönələn xərclərin əmək qabiliyyətli əhali üçün yaşayış minimumunun dəyərində payı 58 faiz, pensiyaçılar üçün 67 faiz, uşaqlar üçün 61 faiz təşkil edib. Göründüyü kimi, ərzaq xərcləri pensiyaçıların yaşayış minimumunun dəyərində daha çox paya malikdir”.
