Ölkədən çıxması qadağan olunan borcluların sayı artıb
Vergilər Nazirliyi vergi borcuna görə ölkədən çıxışına qadağa qoyulmuş şəxslərin yeni siyahısını açıqlayıb. Novator.az bildirir ki, noyabrın 22-nə olan rəsmi hesabata əsasən, ölkədən getmək hüququ yasaqlanan fiziki şəxslərin sayı 449-a (Siyahı), hüquqi şəxslərin icra orqanlarının rəhbərlərinin sayı 998 nəfərə (Siyahı) yüksəlib.
Bir ay öncə 385 fiziki şəxsin, 634 rəhbərin ölkədən çıxması qadağan olunmuşdu.
“İcra haqqında” qanuna, Vergi Məcəlləsinə əsasən, vergi ödəyicisi vergi borcunu ödəmədikdə məhkəmə qərarı ilə fiziki şəxslərin və ya hüquqi şəxslərin icra orqanlarının rəhbərlərinin ölkədən getmək hüququ müvəqqəti məhdudlaşdırıla bilər. Vergi borcunu tam ödəməyənə kimi belə şəxslərin ölkədən kənara çıxmasına icazə verilmir.
