Neftin qiyməti və gözləntilər
Noyabrın 22-si dünya birjalarında neftin qiyməti artıb. “AzəriLayt” markalı neftin bir barrelinin qiyməti 2,60 dollar qalxaraq 49,64 dollar olub.
Nyu-York birjasında “Layt” markalı neftin bir barrelinin qiyməti 1,80 dollar artaraq 47,49 dollara, London birjasında “Brent” markalı neftin bir barrelinin qiyməti 2,04 dollar qalxaraq 48,90 dollara çatıb.
AZƏRTAC-ın yaydığı şərhə görə, neft ixrac edən ölkələri birləşdirən OPEK İranın neft istehsalını məhdudlaşdırmağa etirazını bu ölkəyə imtiyaz verməklə aradan qaldırmağı planlaşdırır.
Sentyabrın sonunda OPEK-in Əlcəzairdəki qeyri-rəsmi görüşündə neft hasilatının sutkada 32,5-33 milyon barrel səviyyəsində məhdudlaşdırılması üzrə ilkin razılığa gəlinib. Yekun qərarın bu ayın sonunda Vyanada qəbul edilməsi nəzərdə tutulur.
Təşkilata üzv ölkələrin energetika nazirlərinin Qətərin paytaxtı Dohadakı görüşündə İrana istehsal səviyyəsini gündəlik 3,92 milyon barreldə saxlaması təklif edilib. Daha əvvəl neft istehsalını yanvar ayında ləğv edilən beynəlxalq sanksiyalardan əvvəlki səviyyəyə çıxarana qədər artıracağını açıqlayan İran rəsmiləri keçən ay bu həcmin 4 və ya 4,2 milyon barreldə saxlanmasının mümkünlüyünü bildirmişdilər.
1960-cı ildə yaradılmış OPEK-in 14 üzvü var: Səudiyyə Ərəbistanı, İran, İraq, Küveyt, Birləşmiş Ərəb Əmirlikləri, Qətər, İndoneziya, Əlcəzair, Liviya, Nigeriya, Qabon, Anqola, Ekvador, Venesuela.
