Naxçıvan iqtisadiyyatı 10 ayda
Naxçıvan Muxtar Respublikasının Dövlət Statistika Komitəsi 10 aylıq sosial-iqtisadi göstəriciləri açıqlayıb. AZƏRTAC xəbər verir ki, bu ilin yanvar-oktyabr aylarında Naxçıvanda 358 milyon 987 min 300 ABŞ dolları həcmində xarici ticarət dövriyyəsi qeydə alınıb. İxracın həcmi son bir ildə 1,3 faiz artıb, idxalın həcmi 34,5 faiz azalıb, 292 milyon 613 min 100 ABŞ dolları həcmində müsbət saldo yaranıb.
Yanvar-oktyabr aylarında Naxçıvanda 1 milyard 999 milyon 800 min 800 manatlıq ümumi daxili məhsul istehsal olunub, bu da 2015-ci ilin müvafiq dövrü ilə müqayisədə 0,7 faiz çoxdur. Hər bir nəfərə düşən ümumi daxili məhsulun həcmi 2015-ci ilin müvafiq dövrü ilə müqayisədə 2,8 faiz artaraq 4479,8 manata çatıb.
10 ayda muxtar respublikada sənaye üzrə 787 milyon 680 min 700 manat həcmində məhsul istehsal edilib. Bu, 2015-ci ilin müvafiq dövründəki göstəricini 2,2 faiz üstələyir.
Yanvar-oktyabr aylarında muxtar respublikaya 824 milyon 480 min 600 manat həcmində investisiya yönəldilib, bu da bir il öncəki göstəricidən 5,4 faiz çoxdur.
10 ayda 348 milyon 879 min 400 manat həcmində kənd təsərrüfatı məhsulu istehsal olunub. Bu, 2015-ci ilin müvafiq dövründəki göstəricini 6,4 faiz üstələyir.
2016-cı il oktyabrın 1-nə muxtar respublikada əhalinin sayı bir il öncəyə nisbətdə 4876 nəfər və ya 1,1 faiz artaraq 448 min 40 nəfərə çatıb.
