Rus dilinə keçmiş SSRİ məkanında status vermək təklif olundu
Rusiya Xarici İşlər Nazirliyinin yüksək rəsmisi keçmiş SSRİ ölkələrində rus dilinə hüquqi status verilməsi təklifi ilə çıxış edib. Novator.az-ın məlumatına görə, XİN-in xüsusi tapşırıqlar üzrə səfiri Eleonora Mitrofanova deyib ki, dünyada rus dilinin tətbiqi ilə bağlı problemlər var, ön planda isə rus dilinin yaxın xaricdəki statusu məsələsi durur. Diplomat qeyd edib ki, MDB məkanında rus dili ən yaxşı halda milli ünsiyyət vasitəsi kimi tətbiq olunur, bunu isə dəqiq və aydın hüquqi status saymaq olmaz.
Mitrofanova BMT-nin hesabatından misal çəkərək deyib ki, 2015-ci ildə Rusiyanı çıxmaqla MDB ölkələrinin 138 milyon əhalisi olub, onların 35,6 milyonu rus dilini qətiyyən bilmir: “Rus dilinin hüquqi baxımdan ən pis durumda olduğu ölkələr Latviya və Estoniyadır. Bu ölkələrin əhalisinin əhəmiyyətli bir qismi rus dilində danışır, ancaq rus dili hüquqi baxımdan rəsmiləşməyib, rus dili sıxışdırılır, ilk növbədə təhsil sahəsində diskriminasiyaya məruz qalır”.
Mitrofanova deyib ki, Qazaxıstanda, Ukraynada, Estoniyada, Latviyada yaşayan ruslar haqlı olaraq rus dilinin durumu ilə bağlı məsələ qaldırırlar: “Rus dilinin xaricdə yayılması üçün səylər göstərmək zəruridir. Keçmiş SSRİ ölkələrində rus dilinə qanunvericilik səviyyəsində status verilməsi məsələsini ən yüksək səviyyədə qaldırmaq lazımdır. Bu məsələ xarici siyasətimizin gündəliyində olmalıdır”.
Keçmiş SSRİ-nin 11 respublikası MDB-nin üzvüdür: Rusiya, Belarus, Ukrayna, Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan. Gürcüstan bu qurumu tərk edib, Latviya, Litva, Estoniya isə Avropa İttifaqına üzvdürlər.
