Bölgələrə nə qədər dotasiya nəzərdə tutulur?
Gələn ilin dövlət büdcəsi layihəsində yerli gəlir və xərcləri tənzimləmək üçün mərkəzləşdirilmiş xərclərdən 68 milyon 420 min manat ayrılması nəzərdə tutulur. 34 şəhər və rayona (Bakı, Gəncə, Lənkəran, Mingəçevir, Naftalan, Sumqayıt, Şəki, Şirvan, Yevlax, Abşeron, Ağcabədi, Astara, Beyləqan, Bərdə, Biləsuvar, Göyçay, Hacıqabul, Xaçmaz, İmişli, İsmayıllı, Kürdəmir, Qazax, Qəbələ, Quba, Qubadlı, Qusar, Masallı, Neftçala, Saatlı, Sabirabad, Salyan, Siyəzən, Şabran, Şamaxı) heç bir vəsait ayırmamaq planlaşdırılır.
Novator.az dotasiya alacaq şəhər və rayonların siyahısına da nəzər salıb. 2017-ci ildə mərkəzləşdirilmiş xərclərdən ən çox dotasiya Ağdam rayonuna ayrılacaq: 4 milyon 676 min manat.
Gədəbəyə 3 milyon 742 min manat, Qaxa 3 milyon 703 min manat, Laçına 3 milyon 517 min manat, Şəmkirə 3 milyon 361 min manat, Ağdaşa 3 milyon 129 min manat, Goranboya 3 milyon 38 min manat, Lerikə 3 milyon 33 min manat dotasiya ayırmaq nəzərdə tutulur.
1 milyon manatdan az dotasiya alacaq rayonlar da var. Bunlar Daşkəsən (986 min manat), Xocalı (901 min manat), Xızı (707 min manat), Qobustan (372 min manat), Zəngilan (334 min manat) rayonlarıdır.
2017-ci ilin dövlət büdcəsi layihəsinə görə, Naxçıvan Muxtar Respublikasının büdcəsinə veriləcək dotasiyanın məbləği 278,9 milyon manatdır. Bələdiyyələrə isə 5,2 milyon dollar dotasiya nəzərdə tutulur.
