Təlimlərə kollegiya iclasında yekun vurulub
Müdafiə naziri general-polkovnik Zakir Həsənov nazirliyin və Silahlı Qüvvələrin rəhbər heyəti, birlik və birləşmələrin komandir və qərargah rəisləri, eləcə də məsul zabitlərin iştirakı ilə irimiqyaslı təlimlərin yekunlarına dair kollegiya iclası keçirib.
Azərbaycan Silahlı Qüvvələrinin noyabrın 12-dən səhra şəraitində keçirdiyi təlimlərə 60 mindən artıq şəxsi heyət, 50-dən çox təyyarə və helikopter, 150-dən artıq tank və zirehli texnika, raket və artilleriya qoşunlarının 700-dək sistemi cəlb edilib.
Noyabrın 17-də yayılan rəsmi məlumata görə, kollegiya iclasında çıxış edən müdafiə naziri deyib ki, müxtəlif poliqonlar və təlim sahələrində keçirilən irimiqyaslı təlimlərdə qarşıya qoyulan məqsəd və vəzifələr uğurla yerinə yetirilib.
Nazir bütün qoşun növ və qisimləri, xüsusi təyinatlılar, təminat vasitələrinin döyüş şəraitinə maksimal uyğunlaşdırılmış vəziyyətdə imkanlarını praktiki tətbiq edərək təlim-döyüş tapşırıqlarını tələb olunan səviyyədə icra etdiyini vurğulayıb, döyüş atışlarının icrası, bölmələrin və atəşin manevrlərinin həyata keçirilməsi zamanı komandirlərin və şəxsi heyətin peşəkarlığını yüksək qiymətləndirib.
Şəxsi heyətin döyüş qabiliyyəti və mənəvi-psixoloji hazırlığını xüsusi qeyd edən müdafiə naziri belə təlimlərin keçirilməsinin əhəmiyyətini vurğulayaraq ali baş komandanın Silahlı Qüvvələr qarşısında qoyduğu müvafiq tapşırıqları komandir-rəis heyətinə çatdırıb.
