Güzəştli kredit göstəriciləri açıqlanıb
İqtisadiyyat Nazirliyinin Sahibkarlığa Kömək Milli Fondu noyabrın 17-də Göyçayın Ləkçıplaq kəndində işgüzar forum keçirib. Rəsmi məlumata görə, 80-ə yaxın sahibkarın qatıldığı forumda çıxış edən Sahibkarlığa Kömək Milli Fondunun icraçı direktoru Şirzad Abdullayev deyib ki, bu il 2145 sahibkara 135,8 milyon manat güzəştli kredit verilib, bu kreditlərdən istifadə etməklə investisiya layihələrinin reallaşdırılması 6400-ə yaxın yeni iş yerinin açılmasına imkan yaradır.
Fond rəhbəri qeyd edib ki, ümumilikdə indiyədək Aran iqtisadi rayonunda fəaliyyət göstərən sahibkarlıq subyektlərinin 12700-ə yaxın investisiya layihəsinin maliyyələşdirilməsinə 496,4 milyon manat güzəştli kredit ayrılıb.
İşgüzar forumda Göyçay və ətraf rayonlardan olan 47 sahibkar 1,7 milyon manat güzəştli kredit alıb. Kreditlər əsasən heyvandarlıq, quşçuluq, bağçılıq, tara, qənnadı məmulatları və kişmiş, mebel istehsalı və s. sahələrin inkişafına yönəldiləcək. Bu kreditlərin reallaşdırılması hesabına 100-dən çox yeni iş yerinin açılması mümkün olacağı bildirilir.
