Ermənistan parlamenti hərbi vergi qanununa səs verdi
Noyabrın 17-də Ermənistan parlamenti döyüş şəraitində həlak olmuş və yaralanmış hərbi qulluqçulara təzminat fondu yaradılması barədə qanun layihəsini birinci oxunuşda qəbul edib. Novator.az-ın məlumatına görə, 102 deputat layihənin qəbul edilməsinə səs verib, 3 nəfər bunun əleyhinə çıxıb.
Sosial istiqamətli bəzi qanunlarda dəyişikliyi nəzərdə tutan layihədə işləyən şəxslərin maaşından fonda ayda 1000 dram (2 dollara yaxın) tutulması təklif olunur.
Fonddan döyüş şəraitində ölən və I qrup əlil olan hərbi qulluqçu üçün 10 milyon dram (20 min dollara yaxın), II qrup əlil olan hərbi qulluqçu uçun 5 milyon dram (10 min dollara yaxın) birdəfəlik təzminat ayrılacaq.
I qrup əlillər üçün 20 il ərzində sığorta ödənişi nəzərdə tutulur. Zabitlər ayda 300 min dram (600 dollar), gizirlər 250 min dram (500 dollar), sıravi heyət 200 min dram (400 dollar) alacaq.
II qrup əlillər üçün də aylıq sığorta ödənişi planlaşdırılır: zabitlərə 200 min dram, gizirlərə 150 min dram (300 dollar), sıravi heyətə 100 min dram (200 dollar) veriləcək.
Yeniliklərin 2017-ci ildən tətbiq olunacağı gözlənir.
