Sənayedə düşmə, kənd təsərrüfatında artım var
Sənaye müəssisələri və bu sahədə fəaliyyət göstərən fərdi sahibkarlar 2016-cı ilin yanvar-oktyabr aylarında 26 milyard manatlıq və ya əvvəlki ilin müvafiq dövrü ilə müqayisədə 0,2 faiz az sənaye məhsulu istehsal edib. Novator.az-ın məlumatına görə, Dövlət Statistika Komitəsi bildirir ki, sənayenin qeyri-neft sektorunda məhsul istehsalı 3,4 faiz artıb, neft sektorunda isə 0,7 faiz azalıb.
Rəsmi hesabata əsasən, 2015-ci ilin yanvar-oktyabr ayları ilə müqayisədə kənd təsərrüfatının ümumi məhsulu 1,8 faiz, o cümlədən bitkiçilik məhsulları istehsalı 1,2 faiz, heyvandarlıq məhsulları istehsalı isə 2,5 faiz artıb.
Nəqliyyat sektoruna gəlincə, 2016-cı ilin yanvar-oktyabr aylarında yük daşınmasının 2015-ci ilin müvafiq dövrü ilə müqayisədə 0,8 faiz azaldığı, sərnişin daşınmasının isə 1,9 faiz artdığı qeyd olunur.
İnformasiya və rabitə müəssisələrində hüquqi və fiziki şəxslərə 1 milyard 302,9 milyon manatlıq xidmətlər göstərilib. 2015-ci ilin müvafiq dövrü ilə müqayisədə 2016-cı ilin yanvar-oktyabr aylarında informasiya və rabitə xidmətlərinin həcmi 3,8 faiz artıb, bu sahədə əldə edilmiş gəlirin 80,5 faizi qeyri-dövlət sektorunun payına düşüb.
2016-cı ilin yanvar-oktyabr aylarında ölkə iqtisadiyyatına 11 milyard 889,2 milyon manat məbləğində vəsait yönəldilib. Sərmayənin 80,7 faizi məhsul istehsalı obyektlərinin, 15,2 faizi xidmət sahələri üzrə obyektlərin, 4,1 faizi isə yaşayış evlərinin tikintisinə sərf olunub. Əsas kapitala yönəldilmiş vəsaitlərin 40,9 faizini daxili vəsaitlər təşkil edib.
