Əhalinin və dövlətin gəlirləri açıqlanıb
Bu ilin 10 ayında (yanvar-oktyabr) əhalinin gəlirləri əvvəlki ilin müvafiq dövrü ilə müqayisədə nominal ifadədə 8,7 faiz artaraq 36 milyard 635,8 milyon manata çatıb. Novator.az-ın məlumatına görə, Dövlət Statistika Komitəsi belə hesabat yayıb.
Hesabatda qeyd olunur ki, 10 ayda gəlirlərin 78,9 faizi son istehlak xərclərinə, 9,1 faizi vergilərin, sığorta və üzvlük haqlarının, 2,6 faizi kreditlər üzrə faizlərin ödənilməsinə sərf edilib, 9,4 faizi isə yığıma yönəldilib.
Dövlət Statistika Komitəsi Maliyyə Nazirliyinin məlumatlarına əsaslanıb bildirir ki, 2016-cı ilin yanvar-oktyabr aylarında dövlət büdcəsinə 12 milyard 103,9 milyon manat vəsait gəlib, büdcədən 12 milyard 468,2 milyon manat vəsait xərclənib, büdcənin icrasında yaranmış 364,3 milyon manatlıq kəsir ümumi daxili məhsulun 0,7 faizi səviyyəsində olub.
Mərkəzi Bankın hesabatına görə, 2016-cı ilin oktyabr ayının 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 16 milyard 785,1 milyon manat təşkil edib. Kredit portfeli 2015-ci il oktyabr ayının 1-i ilə müqayisədə 12,2 faiz azalıb. Ödəmə vaxtı keçmiş kreditlərin məbləği ümumi kredit portfelinin 9,5 faizinə bərabər olub.
2016-cı il oktyabr ayının 1-nə əhalinin banklarda milli valyuta ekvivalentində 7 milyard 813,9 milyon manat məbləğində əmanətləri olduğu bildirilir.
