Yol hərəkəti qanununda nələr dəyişdi?
Prezident İlham Əliyev “Yol hərəkəti haqqında” qanunda (Qanun) dəyişiklikləri imzalayıb. Novator.az-ın məlumatına görə, qanunun 33-cü maddəsi (Nəqliyyat vasitələrini idarəetmə hüququ) yenilənib.
İndiyədək “BE” kateqoriyasına daxil olan nəqliyyat vasitələrini idarəetmə hüququ 19 yaşdan idi. Qanunda yenilik bunun üçün “B” kateqoriyasına daxil olan nəqliyyat vasitələrini idarə etmək sahəsində bir il təcrübə şərti qoyub.
“CE” və “D” kateqoriyasına daxil olan nəqliyyat vasitələrini idarəetmə hüququnu 21 yaşdan müəyyən edən norma qanundan çıxarılıb.
“CE” kateqoriyasına daxil olan nəqliyyat vasitələrini idarəetmə hüququ 21 yaşdan olacaq, amma bunun üçün “C” kateqoriyasına daxil olan nəqliyyat vasitələrini idarə etmək sahəsində üç il təcrübə tələb ediləcək.
“D” kateqoriyasına daxil olan nəqliyyat vasitələrini idarəetmə hüququ 23 yaşdan (65 yaşadək və avtonəqliyyat vasitələrini idarə etmək sahəsində təcrübə beş ildən az olmamaq şərti ilə) veriləcək.
“DE” kateqoriyasına daxil olan nəqliyyat vasitələrini idarəetmə hüququ 26 yaşdan olacaq. Bu hüquq 65 yaşadək və “D” kateqoriyasına daxil olan nəqliyyat vasitələrini idarə etmək sahəsində üç il təcrübəsi olan şəxslərə şamil edilir.
