Dövlət Miqrasiya Xidməti oktyabrın hesabatını verdi
Dövlət Miqrasiya Xidməti oktyabr ayı üzrə statistika açıqlayıb. Novator.az-ın məlumatına görə, rəsmi hesabatda bildirilir ki, ötən ay 2299 əcnəbi ölkədə olma, müvəqqəti və daimi yaşama qaydalarını pozub. 18 nəfərin müvəqqəti və ya daimi yaşamaq üçün əsas verən sənədləri yenisi ilə əvəz olunub, 212 nəfərin ölkədə yaşaması leqallaşdırılıb, 1576 əcnəbinin ölkə ərazisini 48 saat ərzində tərk etmələri, 493 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.
Ay ərzində Dövlət Miqrasiya Xidmətinə əcnəbilər və vətəndaşlığı olmayan şəxslərdən 10 min 807 müraciət daxil olub. Olduğu yer üzrə qeydiyyatla bağlı 45 min 874 əcnəbinin müraciəti qeydə alınıb.
Xidmətin qanunsuz miqrasiyaya qarşı keçirilən tədbirləri zamanı 3 nəfər Pakistan, 4 nəfər Banqladeş vətəndaşı saxlanıb.
