Ramiz Mehdiyevin sədrliyi ilə yeni komissiya yaradıldı
Noyabrın 14-də prezident İlham Əliyev su anbarlarının istismar vəziyyətinin öyrənilməsi ilə əlaqədar dövlət komissiyası yaradıb. Sərəncamda qeyd olunur ki, ölkənin su, ərzaq və enerji təhlükəsizliyinin təmin edilməsində mühüm rol oynayan Şəmkir, Yenikənd, Mingəçevir, Varvara, Ceyranbatan və digər su anbarları uzun müddət istismar olunduğundan bu hidroqovşaqlarda mövcud problemlərin öyrənilməsi və qiymətləndirilməsi, baş verə biləcək texnogen proseslərin proqnozlaşdırılması zərurəti yaranıb.
Dövlət komissiyasına Prezident Administrasiyasının rəhbəri Ramiz Mehdiyev sədrlik edəcək. Qurumun üzvləri Abid Şərifov (baş nazirin müavini), Zeynal Nağdəliyev (Prezident Administrasiya rəhbərinin müavini, regional idarəetmə və yerli özünüidarəetmə orqanları ilə iş şöbəsinin müdiri), Kəmaləddin Heydərov (fövqəladə hallar naziri), Ramil Usubov (daxili işlər naziri), Samir Şərifov (maliyyə naziri), Şahin Mustafayev (iqtisadiyyat naziri), Hüseynqulu Bağırov (ekologiya və təbii sərvətlər naziri), Etibar Pirverdiyev (“Azərenerji” Açıq Səhmdar Cəmiyyətinin sədri), Qorxmaz Hüseynov (“Azərsu” Açıq Səhmdar Cəmiyyətinin sədri), Əhməd Əhmədzadədir (Azərbaycan Meliorasiya və Su Təsərrüfatı Açıq Səhmdar Cəmiyyətinin sədri).
Dövlət komissiyası su anbarlarının hidrotexniki qurğularında və su mühafizə zonasında mövcud problemləri araşdırıb, su anbarlarının bəndlərinə təhlükə yaradan amilləri müəyyənləşdirib texniki təhlükəsizliyini təmin edən tədbirlərə dair təkliflərini iki ay müddətində hazırlamalıdır.
