Qruplarda vəziyyət necədir?
2018-ci ilin dünya çempionatının seçmə mərhələsinə yaxşı başlamış Azərbaycanın milli futbol komandası ötən cümə büdrədi. Avropa zonasının C qrupunda yarışan milli komanda 3 oyuna 7 xal toplayaraq ikinci yerdə idi. Noyabrın 11-i Belfastda Şimali İrlandiyanın qonağı olan milli komanda 0:4 hesabı ilə uduzaraq qrupda üçüncü sıraya gerilədi.
Rusiyada keçiriləcək final mərhələsinə Avropadan 13 vəsiqə uğrunda mübarizə 9 qrupda gedir. Qrup qalibləri finala birbaşa vəsiqə alacaq, ikinci yeri tutan komandalardan 8-i isə qalan vəsiqələr üçün əlavə oyunlar keçirəcək.
Dörd turdan sonra C qrupuna 12 xalla Almaniya başçılıq edir. Azərbaycanla eyni miqdarda (7) xal toplayan Şimali İrlandiya milli komandası top fərqinə görə ikinci yerdə qərar tutur.
Novator.az digər qruplardakı duruma da nəzər salıb.
A qrupunda Fransa 10 xalla liderdir. Hollandiya 7 xalla ikinci pillədədir. Üçüncü sırada dayanan İsveçin də 7 xalı var.
B qrupunda İsveçrə 12 xalla öndədir. İkinci yerdə gedən Portuqaliyanın 9 xalı var.
D qrupunda ilk pilləni 10 xalla İrlandiya tutur. Serbiya 8 xalla ikincidir.
E qrupunda lider Polşanın 10 xalı var. Monteneqro 7 xalla ikinci pillədə qərarlaşıb.
F qrupuna 10 xalla İngiltərə başçılıq edir. İkinci yerdə dayanan Sloveniyanın 8 xalı var.
G qrupunda ilk iki pillədə qərar tutan İspaniya və İtaliya 10 xal toplayıb. Onları 9 xalla İsrail təqib edir.
H qrupunda Belçika 12 xalla birinci, Yunanıstan 10 xalla ikincidir.
İ qrupunda Xorvatiya 10 xalla birinci pillədədir. Ukraynanın 8, İslandiyanın 7, Türkiyənin 5 xalı var (Turnir cədvəlləri).
