Müdafiə naziri səhra şəraitində müşavirə keçirib
Azərbaycanın müdafiə naziri Zakir Həsənov təlimlərin səhra şəraitində yaradılmış əsas komanda məntəqəsinə baş çəkib. Noyabrın 14-də yayılan rəsmi məlumata görə, nazir ərazidə idarə, xidmət, qoşun növlərinin yerləşmə nöqtələri, operativ idarəetmə qrupları və məntəqələrindəki fəaliyyətlərlə tanış olub.
Müşavirədə təlimlərə cəlb edilən birləşmə, hərbi hissələrin komandir və rəis heyətinin fəaliyyətləri, planları və qəbul etdikləri qərarlarla bağlı məruzələr dinlənilib. Müdafiə naziri təlimlərin əhəmiyyətindən və qarşıda duran vəzifələrdən danışaraq müvafiq tapşırıq və göstərişlər verib.
Noyabrın 12-də səhra şəraitində qoşunların idarə olunması və silahların döyüş tətbiqinin yoxlanması məqsədilə Silahlı Qüvvələrdə irimiqyaslı təlimlər başlayıb. Təlimlərə 60 minədək şəxsi heyət, 50-dən çox təyyarə və helikopter, 150-dən artıq tank və zirehli texnika, eləcə də raket və artilleriya qoşunlarının 700-dək qurğu və sistemi cəlb olunub.
