Mərkəzi Bank pul siyasəti icmalını açıqlayıb
Mərkəzi Bank yanvar-sentyabr ayları üzrə pul siyasəti icmalını açıqlayıb. İcmalda qeyd olunur ki, 9 ay ərzində valyuta bazarının həcmi ötən ilin müvafiq dövrünə nisbətən kəskin azalıb: “Hesabat dövründə ötən ilin eyni dövrü ilə müqayisədə ABŞ dolları ilə valyuta əməliyyatlarının həcmi 2,8 dəfə, avro ilə əməliyyatların həcmi isə 2,7 dəfə düşüb. Dövr ərzində valyuta bazarında əməliyyatların 85 faizi ABŞ dollarında, 15 faizi digər valyutalarda aparılıb.
Valyuta bazarının həcminin azalması nağd xarici valyuta bazarı seqmentində də müşahidə edilib. 2016-cı ilin yanvar-sentyabr aylarında bankların satdığı xalis (yəni alışlarla satışların fərqi) nağd ABŞ dolları ötən ilin eyni dövrü ilə müqayisədə 25 dəfə azalaraq 281 milyon ABŞ dolları, avro ilə əməliyyatlar isə 3,3 dəfə azalaraq 193 milyon avro təşkil edib”.
AZƏRTAC bildirir ki, Mərkəzi Bank valyuta bazarında iştirakını minimuma endirib, Dövlət Neft Fondunun valyuta satışları da Mərkəzi Bankda təşkil olunan hərraclar çərçivəsində həyata keçirilib: “9 ay ərzində Dövlət Neft Fondu 4 milyard ABŞ dolları məbləğində xarici valyuta satıb. Oktyabrın 1-nə Mərkəzi Bankın xarici valyuta ehtiyatları 4,1 milyard dollar olub. Mərkəzi Bankın valyuta ehtiyatlarının həcmi kifayətlilik üzrə beynəlxalq təcrübədə qəbul edilmiş normaları (3 aylıq mal və xidmət idxalını örtmək, milli valyuta ilə pul təklifinə nisbət və s.) üstələyir” (Pul siyasəti icmalı).
