![]({"full":{"0":"2016\/11\/Maykl-Pens-2.jpg","1":686,"2":481,"3":false,"file":"https:\/\/novator.az\/wp-content\/uploads\/2016\/11\/Maykl-Pens-2.jpg"}})
ABŞ-da noyabrın 8-də keçirilmiş prezident seçkisində vitse-prezidentin də kimliyinə aydınlıq gəldi. Respublikaçılar Partiyasının namizədi Donald Trampın qalib olduğu seçkidə vitse-prezident postuna Maykl (Mayk) Pens seçildi.
ABŞ-da prezidentlə birgə seçilən vitse-prezident Konqresin yuxarı palatası olan Senata sədrlik edir. Dövlət başçısı vəzifədən vaxtından əvvəl getdikdə onun səlahiyyətləri vitse-prezidentə keçir.
Novator.az bildirir ki, Maykl Riçard Pens 1959-cu il iyunun 7-də İndiana ştatının Kolumbus şəhərində doğulub. Əcdadları irland əsillidir. Atası Edvard Pens yanacaqdoldurma məntəqələri şəbəkəsinin sahibi olub.
Maykl Pens 1981-ci ildə Hanover Humanitar Kollecini, 1986-cı ildə İndiana Universitetinin Hüquq Məktəbini bitirib.
1988-1990-cı illərdə Respublikaçılar Partiyasından ABŞ Konqresinə namizəd olub, ancaq seçilə bilməyib.
1991-93-cü illərdə “İndiana Policy Review” fonduna prezidentlik edən Maykl Pens 1992-ci ildən İndiana ştatında radio aparıcısı, 1995-ci ildən televiziya aparıcısı olub.
2000-ci ildən ABŞ Konqresinin Nümayəndələr Palatasında İndiana ştatını təmsil edən Pens 2012-ci ildə ştatın qubernatoru seçilib.
Katolik ailəsində doğulan Maykl Pens sonradan kollecdə oxuyarkən məzhəbini dəyişərək protestantlığı qəbul edib. O, çox mühafizəkar baxışları ilə tanınır.
Maykl Pens ABŞ-ın vitse-prezidenti postuna 2016-cı il iyulun 19-da Respublikaçılar Partiyasının qurultayında namizəd göstərilib.
Ailəlidir, 3 övladı var.