Parlament hökumətə yaşıl işıq yandırdı
Qırğızıstan parlamenti yeni hökumətin strukturunu və proqramını təsdiq edib. Novator.az-ın məlumatına görə, noyabrın 9-da keçirilən səsvermədə 120 deputatın 112-si hökuməti dəstəkləyib.
Sooronbay Jeenbekovun baş nazir olduğu hökuməti Sosial Demokrat, Qırğızıstan və Bir Bol partiyalarının parlament fraksiyaları qurub.
Ölkə prezidenti əvvəlki hökuməti oktyabrın 26-da istefaya göndərib. Bu, 4 fraksiyadan formalaşan parlament koalisiyasının dağılması ilə bağlı olub.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi 120 yerlik parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
