Ali məktəblərin sayı 52-yə çatdı
Prezident İlham Əliyev Təhsil Nazirliyinin tabeliyində fəaliyyət göstərən Bakı Mühəndislik Universitetinin yaradılmasına sərəncam verib. Noyabrın 8-də imzalanan sərəncamda qeyd olunur ki, Azərbaycan iqtisadiyyatının indiki inkişaf səviyyəsi sənaye müəssisələrində istehsal proseslərini təşkil etmək və innovativ texnologiyalarla işləmək bacarığına malik mütəxəssislərin hazırlığını həyata keçirən, müasir tələblərə uyğun yeni ali təhsil müəssisəsinin təsis edilməsi zərurətini meydana çıxarıb. Yeni universitet ali təhsilin bütün səviyyələri üzrə mühəndis kadrlarının hazırlığı, bu sahədə ali və əlavə təhsil proqramlarının həyata keçirilməsi, fundamental və tətbiqi elmi tədqiqatlarla məşğul olacaq.
Nazirlər Kabineti Bakı Mühəndislik Universitetinin nizamnaməsinin layihəsini iki ay müddətində hazırlayıb prezidentə təqdim etməlidir.
Novator.az bildirir ki, təhsil qanununa görə, Azərbaycan Respublikasında ali təhsil müəssisəsi bir neçə formada ola bilər: ali kolleclər, institutlar, konservatoriyalar, akademiyalar, universitetlər və s. Hazırda Azərbaycanda 51 ali məktəb var. Bunun 38-i dövlətin yaratdığı ali təhsil ocağıdır.
