Qırğızıstan hökuməti təsdiqə getdi
Noyabrın 8-də Qırğızıstan hökumətinin strukturu və tərkibi təsdiq üçün parlamentə təqdim olunub. Novator.az xəbər verir ki, baş nazir postuna Nazirlər Kabineti rəhbərinin səlahiyyətlərini icra edən Sooronbay Jeenbekovun namizədliyi irəli sürülüb. Daxili işlər naziri postuna Dövlət Milli Təhlükəsizlik Komitəsinin Antikorrupsiya Xidmətinin direktoru Ulan İsrailovun namizədliyi verilib. Baş nazirin sosial məsələlər üzrə müavini və təhsil naziri istisna olmaqla hökumətin tərkibi əhəmiyyətli dərəcədə dəyişməyib.
Ölkə prezidenti oktyabrın 26-da hökuməti istefaya göndərib. Bu, 4 fraksiyadan formalaşan parlament koalisiyasının dağılması ilə bağlı olub.
Hökumət koalisiyasını Sosial Demokrat Partiyası 2015-ci ilin noyabrında Respublika – Ata Yurd, Tərəqqi və Qırğızıstan partiyaları ilə birgə yaratmışdı.
Noyabrın 3-ü Qırğızıstan parlamentində hakim çoxluq yaradılıb. Koalisiyaya Sosial Demokrat, Qırğızıstan və Bir Bol partiyalarının parlament fraksiyaları daxil olub.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi 120 yerlik parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
