Prezident qalib elan olundu
Nikaraquada prezident seçkisinin yekun rəsmi nəticəsi elan olunub.
Novator.az-ın məlumatına görə, noyabrın 8-də Ali Seçki Şurası ölkənin hazırkı prezidenti Daniel Orteqanın üçüncü müddətə dövlət başçısı seçildiyini bəyan edib.
Rəsmi məlumata görə, Daniel Orteqa səslərin 72,5 faizini toplayıb.
Mərkəzi Amerika ölkəsi olan Nikaraquada prezident seçkisi noyabrın 6-da keçirilib.
Daniel Orteqa həm də Sandinist Cəbhəsinin başçısıdır, onun prezidentliyə namizədliyi bu cəbhədən irəli sürülmüşdü.
Daniel Orteqa prezident postunu 2006-cı ildən tutur. O, 1985-1990-cı illərdə də Nikaraquaya rəhbərlik edib.
Ali Seçki Şurasının yekun hesablamasına görə, 6 noyabr seçkisində ikinci yeri 15 faiz səslə Maksimino Rodriges tutub. Rodriges vətəndaş müharibəsində sandinistlərə qarşı çıxan döyüşçü kimi tanınır.
