Separatçılar Qarabağa ad qoyur…
İşğalçı Dağlıq Qarabağ rejimi yeni “konstitusiya” qəbul etməyə hazırlaşır. Novator.az-ın məlumatına görə, yeni sənədin 2006-cı ildə qəbul edilmiş “konstitusiya”dan əsas fərqi bölgənin adında dəyişiklik olacaq. Separatçı rejim “Dağlıq Qarabağ Respublikası” adından imtina edib “Arsax Respublikası” variantına keçməyi planlaşdırır. İndiki “konstitusiya”da hər iki variant qüvvədədir.
Bu həftə açıqlanması gözlənən “konstitusiya” layihəsinin ictimai müzakirələrdən sonra işğalçı rejimin başçısına təqdim olunacağı və “referendum”a çıxarılacağı bildirilir.
1923-cü ildə Azərbaycanın tərkibində Dağlıq Qarabağ Muxtar Vilayəti yaradılıb. 1988-ci ildə Dağlıq Qarabağ erməniləri vilayəti Ermənistana birləşdirmək tələbi ilə separatçı hərəkata, işğalçı müharibəyə başlayıb.
1991-ci il sentyabrın 2-də Dağlıq Qarabağ özünü müstəqil dövlət elan edib. Həmin il noyabrın 26-da Azərbaycan Respublikası parlamentinin qərarı ilə Dağlıq Qarabağ Muxtar Vilayəti ləğv olunub.
Hazırda Dağlıq Qarabağ bölgəsi işğalçı rejimin nəzarətindədir. Ermənistan Silahlı Qüvvələri Dağlıq Qarabağdan əlavə 7 rayonu zəbt edib.
Azərbaycan torpaqlarının işğalı, etnik təmizləmələrlə qurulmuş separatçı Dağlıq Qarabağ rejimi 1991-ci ildən indiyəcən seçki adı altında 19 qanunsuz aksiya keçirib: 6 “parlament seçkisi”, 5 “prezident seçkisi”, 6 “bələdiyyə seçkiləri”, 2 “referendum”.
