Neft: gələn ilə nə proqnoz verilir?
Noyabrın 7-si dünya birjalarında neftin qiyməti cüzi artıb. Nyu-York birjasında “Layt” markalı neftin bir barreli 67 sent bahalaşaraq 44,74 dollar, London birjasında “Brent”in bir barrelinin qiyməti isə 70 sent artaraq 46,28 dollar olub.
Analitiklər neftin 2017-ci ildə bahalaşacağını, qiymətin yenə də 60 dollardan aşağı olacağını proqnozlaşdırır. AZƏRTAC xəbər verir ki, ötən günlər həm ABŞ-da, həm də Avropada enerji sektorundakı bəzi şirkətlərin səhmləri əhəmiyyətli dərəcədə dəyər itirib. “Brent” markalı neftin bir barreli də 2 faiz ucuzlaşaraq son üç aydakı ən aşağı qiymətə (45,43 dollar) geriləyib.
OPEK-ə üzv ölkələr uzun zamandır neft hasilatını müəyyən səviyyədə məhdudlaşdıracaqları barədə razılaşmağa çalışırlar. Buna baxmayaraq xam neftin qiyməti ötən həftə də 9,4 faiz ucuzlaşıb. Noyabrın 30-u Vyanada OPEK-in neft hasilatını hansı ölkənin nə qədər azaldacağı barədə razılığa gəlməsi nəzərdə tutulur. Bundan başqa ötən həftə ABŞ-ın neft ehtiyatları son otuz ilin ən yüksək səviyyəsinə çatıb və bu da qlobal neft təklifinin tələbdən daha çox olduğunu göstərir.
Neft sektoru üzrə analitiklər və mütəxəssislər OPEK-in neft təklifinə nəzarət edib-etməyəcəyi barədə narahatdırlar. Mütəxəssislər OPEK-in neftin qiymətini yüksəltmək cəhdinin hər hansı razılıqla nəticələnməsini, yəni müvəffəqiyyətli olması ehtimalını 40 faiz qiymətləndirirlər. OPEK rəsmiləri isə kartelin razılaşmağa yaxın olduğunu bəyan edirlər.
