Həlak olanların sayı açıqlanıb
Türkiyənin Diyarbəkir vilayətinin Bağlar rayonunda noyabrın 4-ü səhər saat 8 radələrində bomba yüklü avtomobil partladılması ilə törədilən terror aktından yeni məlumat yayılıb. Novator.az bildirir ki, Diyarbəkir Polis İdarəsinin terrorla mübarizə və çevik qüvvələr şöbəsinin yerləşdiyi binanın yaxınlığında törədilən partlayışda 8 nəfər həlak olub, 100-dən çox şəxs yaralanıb.
Həlak olanların 2-si polis, 1-i texniki işçi, 5-i mülki şəxsdir. 1 terrorçu da ölüb.
Partlayış üçün bir tondan çox partlayıcı maddənin istifadə edildiyi müəyyən olunub.
Terrorun kürdləri birləşdirən Xalqların Demokratik Partiyasına qarşı əməliyyat fonunda törədildiyi güman edilir. Hakimiyyət parlamentdə 59 deputatla təmsil olunan bu partiyanı terrorçu qurum PKK-ya dəstəkdə günahlandırır.
Noyabrın 4-də Xalqların Demokratik Partiyasının həmsədrləri Səlahəddin Dəmirtaş, Figən Yüksəkdağ və 9 digər deputat (Fərhad Encü, Leyla Birlik, Abdulla Zeydan, Səlma İrmak, İdris Baluken, Sırrı Sürəyya Öndər, Gülser Yıldırım, Ziya Pir, Nursel Aydoğan) saxlanıb.
Barələrində saxlanma qərarı çıxarılan deputatlar Faysal Saryıldız, Tuğba Öztürk xaricdədirlər.
Nihat Akdoğan haqqında da saxlanma qərarı var.
Son məlumata görə, Ziya Pir prokurorluqda dindirildikdən sonra sərbəst buraxılıb.
