Azərbaycan xarici ölkələrdə “iqtisadi səfiriliklər” açır
Xarici ölkələrdə Azərbaycanın ticarət-iqtisadi nümayəndələri fəaliyyət göstərəcək. İqtisadiyyat Nazirliyinin noyabrın 4-də yaydığı məlumatda bildirilir ki, ticarət-iqtisadi nümayəndələr diplomatik korpusun tərkibində çalışacaq.
İxracın təşviqi məqsədi daşıyan bu prosesə öncə Azərbaycan şirkətlərinin daha çox maraq göstərdikləri, böyük idxal potensialı olan ölkələrdən başlanacaq. İlk ölkələr kimi Rusiya, Çin və Birləşmiş Ərəb Əmirlikləri nəzərdə tutulub.
Ticarət-iqtisadi nümayəndələrə Azərbaycanın həmin ölkələrdəki səfirliyinin əməkdaşının malik olduğu status veriləcək.
