Qırğızıstanda yeni hakim koalisiya yaradıldı
Noyabrın 3-ü Qırğızıstan parlamentində hakim çoxluq yaradılıb. Novator.az-ın məlumatına görə, koalisiyaya Sosial Demokrat, Qırğızıstan və Bir Bol partiyalarının parlament fraksiyaları daxil olub.
Ölkə prezidenti oktyabrın 26-da hökuməti istefaya göndərib. Bu, 4 fraksiyadan formalaşan parlament koalisiyasının dağılması ilə bağlı olub.
Oktyabrın 24-də prezidentə dəstək verən Sosial Demokrat Partiyası ortaqlarla fikir ayrılıqları üzündən hökumət koalisiyasından çıxıb. Hökumət koalisiyasını Sosial Demokrat Partiyası 2015-ci ilin noyabrında Respublika – Ata Yurd, Tərəqqi və Qırğızıstan partiyaları ilə birgə yaratmışdı.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi 120 yerlik parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
