Dollar: rəsmi qiymət rekordu təzələdi
ABŞ dollarının rəsmi kursu illik maksimumu ötüb. 2016-cı ildə dolların ən yüksək rəsmi qiyməti martın 11-də qeydə alınmışdı: 1,6456 manat. Novator.az-ın məlumatına görə, Mərkəzi Bank noyabrın 2-də məzənnəni 1,649 manata qaldırmaqla illik rekordu təzələyib. Ötən ayın 28-dən 1 dollar 1,6381 manata təklif olunurdu.
Avro və Rusiya rublu da bahalaşıb. Mərkəzi Bank avronun məzənnəsini 1,7959 manatdan 1,8254 manata, rublun kursunu 0,0259 manatdan 0,0261 manata yüksəldib (Məzənnələr).
2015-ci ildə Azərbaycan manatı ikiqat devalvasiyaya uğrayıb, dolların kursu 78 qəpikdən 1 manat 55 qəpiyə qalxıb. Manatın məzənnəsini nizamlamaq üçün bu ilin 9 ayında keçirilən valyuta hərraclarında Dövlət Neft Fondundan 3 milyard 882,4 milyon dolları, Mərkəzi Bankdan 935,4 milyon dollar alınıb.
Oktyabr ayında isə Dövlət Neft Fondu valyuta hərraclarında 371 milyon ABŞ dolları məbləğində vəsait satıb.
