Yeni sorğu nə göstərir?
ABC televiziyası və “Vaşinqton Post” qəzetinin ABŞ prezidentliyinə namizədlərlə bağlı birgə keçirdiyi yeni sorğunun nəticələri açıqlanıb. Novator.az-ın məlumatına görə, oktyabrın 26-dan 29-dək 1165 potensial seçici arasında keçirilmiş sorğu Demokratlar Partiyasının namizədi Hillari Klintonun Respublikaçılar Partiyasından rəqibi Donald Trampı 1 faiz qabaqladığını göstərir. Rəyi öyrənilənlərin 46 faizi Klintona, 45 faizi Trampa səs verəcəyini bəyan edib.
Sorğunun nəticələrinə əsasən, respondentlərin 60 faizi Klintonun, 58 faizi Trampın namizədliyinə pis baxır.
Klintonu sorğuya qatılanların 49 faizi, Trampı 48 faizi xoşlamır.
Trampın tərəfdarlarının 97 faizi Klintonu bəyənmir. Klintonun tərəfdarları arasında Trampı bəyənməyənlər isə 95 faiz həddindədir.
Prezident seçkisi noyabrın 8-nə təyin olunub. Həmin gün seçicilər ştatların nümayəndələrindən ibarət 538 nəfərlik Seçicilər Kollegiyasının tərkibinə aydınlıq gətirəcək. Bundan ay yarım sonra dövlət başçısını Seçicilər Kollegiyası seçməli, prezidentin adı rəsmən 2017-ci il yanvarın 5-də açıqlanmalıdır. Prezident seçilmək üçün 270 səs kifayət edir.
