Strateji Yol Xəritəsindən təzə xəbər var
Prezident İlham Əliyevin 16 mart 2016-cı il sərəncamı ilə təsdiq edilmiş “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri” adlı sənəd müvafiq işçi qrupunun rəhbərliyi altında yekunlaşıb.
AZƏRTAC-ın məlumatına görə, İqtisadi İslahatların Təhlili və Kommunikasiya Mərkəzinin (İİTKM) icraçı direktoru Vüsal Qasımlı deyib ki, hazırda sənədin hüquqi və linqvistik ekspertizası həyata keçirilir: “Eyni zamanda Strateji Yol Xəritəsinin gələcək 10 ildən artıq müddətdə vacib əhəmiyyəti əsas götürülərək bütün dövlət orqanlarından müvafiq rəylərin alınması prosesi gedir. Sənədin ilin sonuna qədər təsdiqi və ictimaiyyətə açıqlanması planlaşdırılır.
Strateji Yol Xəritəsinin yazılmasında 400 nəfərə qədər xarici və yerli ekspert birbaşa iştirak edib. Sənədin yazılması üçün 4 min nəfərlə 150-yə qədər görüş keçirilib. Bakıda və bölgələrdə ictimai müzakirələr təşkil edilib. İİTKM-də sənədin əhatə etdiyi 11 istiqamət üzrə alt işçi qrupları yaradılaraq beyin mərkəzi formalaşdırılıb. İndiyədək 5 min səhifəlik material işlənib və müxtəlif dövlət orqanları, yerli və xarici akademik dairələr, təhsil müəssisələri, özəl sektor və vətəndaş cəmiyyətinin nümayəndələri 1000-dən çox yazılı təklif verib”.
Milli iqtisadiyyat perspektivi və 11 iqtisadi sektora dair yol xəritəsini özündə birləşdirən Strateji Yol Xəritəsi 12 sənəddən ibarətdir.
