Rauf Mirqədirov İsveçrə hökumətindən sığınacaq istəyib
Sentyabrın 16-da Avropaya gedən jurnalist Rauf Mirqədirov İsveçrə hökumətindən sığınacaq istəyib. Xəbəri noyabrın 1-də “Azadlıq” radiosu jurnalistin vəkili Fuad Ağayevə istinadla yayıb. Vəkilin sözlərinə görə, Rauf Mirqədirov İsveçrə hökumətindən siyasi mühacir statusu almaq fikrindədir.
Novator.az bildirir ki, 55 yaşlı Rauf Mirqədirov uzun illər “Zerkalo” qəzetinin siyasi icmalçısı olub, 2010-cu ildən qəzetin Türkiyədə xüsusi müxbiri postunda çalışıb.
2014-cü il aprelin 19-da tutulan jurnalist dövlətə xəyanətdə təqsirli bilinib. İttihama görə, jurnalist Sülh və Demokratiya İnstitutunun xətti ilə Ermənistan xüsusi xidmət orqanlarına casusluq edib. 2015-ci il dekabrın 28-də Bakı Ağır Cinayətlər Məhkəməsi Rauf Mirqədirovu 6 il müddətinə azadlıqdan məhrum edib.
Bu il martın 17-də Bakı Apellyasiya Məhkəməsi jurnalistin cəzasını 5 il sınaq müddəti tətbiq olunmaqla şərti həbslə əvəzləyib və Rauf Mirqədirov məhkəmə zalından azadlığa buraxılıb.
2014-cü ilin dekabr ayında İsveçrədə Rauf Mirqədirovun həyat yoldaşına və iki qızına siyasi sığınacaq verilib.
