![]({"full":{"0":"2016\/11\/parlament-qirgiz.jpg","1":640,"2":363,"3":false,"file":"https:\/\/novator.az\/wp-content\/uploads\/2016\/11\/parlament-qirgiz.jpg"}})
Qırğızıstanda konstitusiya referendumunun günü bilinir
Noyabrın 1-də Qırğızıstan parlamentinin konstitusiya qanunvericiliyi komitəsi konstitusiya referendumunun vaxtı ilə bağlı qanun layihəsini son oxunuşda qəbul edib. Novator.az-ın məlumatına görə, qanun layihəsinə əsasən, konstitusiyaya dəyişikliklər referendumu dekabrın 11-nə təyin olunur.
Referendum aktı layihəsi parlamentin iki oxunuşundan keçib. Konstitusiya yenilikləri layihəsində baş nazirin səlahiyyətlərini artırmaq, deputata eyni zamanda baş nazir və ya baş nazirin müavini postu tutmaq hüququ verilməsi təklif olunur. Layihə məhkəmə sisteminin, Konstitusiya Məhkəməsinin fəaliyyətində yenilik təkliflərini də əhatə edir.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.