Neft Fondu hərraclarda satdığı vəsaitin məbləğini açıqlayıb
Dövlət Neft Fondu oktyabr ayında valyuta hərraclarında 371 milyon ABŞ dolları məbləğində vəsait satıb. Hesabatı fondun ictimaiyyətlə əlaqələr şöbəsi noyabrın 1-də açıqlayıb.
Oktyabrın 5-dən Mərkəzi Bank valyuta hərracında yeni qayda tətbiq edir. Yeni hərrac mexanizmi bazar iştirakçılarına hər iki istiqamətdə (valyuta alışı və ya satışı) sifarişlə çıxış etmək imkanı verir. Hərraclarda alıcılar və satıcılar hərracın təşkilatçısının elan etdiyi ilkin məzənnə ilə öz valyuta sifarişlərini yerləşdirə bilirlər. Sonra ticarət sessiyaları üzrə valyuta tələbi və təklifinin nisbəti nəzərə alınmaqla məzənnə dəyişdirilir və sonuncu sessiyanın məzənnəsi ilə hərrac başa çatdırılır.
Növbəti günün rəsmi məzənnəsi hərracda və banklararası valyuta bazarında kommersiya bankları ilə bağlanan əqdlər üzrə orta çəkili məzənnə əsasında müəyyən olunur və hər iş gününün sonuna ictimaiyyətə açıqlanır. Valyuta hərracı olmayan günlərdə isə növbəti günün məzənnəsi valyuta bazarında kommersiya bankları arasında bağlanmış alğı-satqı əqdləri üzrə formalaşan orta çəkili məzənnə əsasında müəyyənləşir.
Valyuta hərraclarının nəticələri ilə bağlı ətraflı məlumatların verilməsi dayandırılıb. Hərraca çıxarılan və satılan vəsaitlərin məbləğləri hər ayın sonunda açıqlanacaq.
Novator.az xatırladır ki, bu yeniliyin tətbiqinə qədər Mərkəzi Bank özünün və Dövlət Neft Fondunun hərraclarda satdığı vəsaitin məbləğini açıqlayırdı. Sentyabrın 29-da açıqlanmış son məlumata görə, manatın məzənnəsini nizamlamaq üçün keçirilən valyuta hərraclarında 4 milyard 817,8 milyon ABŞ dolları həcmində vəsait satılmışdı. Bunun 3 milyard 882,4 milyon dolları Dövlət Neft Fondunun, 935,4 milyon dolları Mərkəzi Bankın payına düşmüşdü.
