İnsan Alveri Qurbanlarına Yardım Mərkəzi hesabat yayıb
Dövlət Sosial Müdafiə Fondunun İnsan Alveri Qurbanlarına Yardım Mərkəzi bu il 70 nəfəri yardımlarla təmin edib. Əmək və Əhalinin Sosial Müdafiəsi Nazirliyi bildirir ki, onların 50 nəfəri DİN-in İnsan Alverinə Qarşı Mübarizə Baş İdarəsinin yönləndirdiyi insan alveri qurbanları, 20 nəfəri qeyri-hökumət təşkilatlarının yönləndirdiyi və ya fərdi müraciət etmiş, insan alverinin qurbanına çevrilmək təhlükəsi olan şəxslərdir.
Ümumilikdə 70 nəfər şəxs mərkəzin xidmətləri ilə əhatə olunub. Onların bir çoxuna ehtiyacları nəzərə alınmaqla eyni vaxtda bir neçə növdə yardımlar göstərilib.
30 nəfərə hüquqi, 36 nəfərə psixoloji, 13 nəfərə tibbi yardım göstərilməsi təmin edilib. 31 nəfərin məşğulluğuna, 15 nəfərin peşə hazırlığına cəlb olunmasına köməklik göstərilib.
Qeyd olunan insanların əksəriyyətinin sosial reabilitasiyasına nail olunub, eləcə də insan alverinin qurbanına çevrilmək təhlükəsi aradan qaldırılıb. İnsan alveri qurbanlarının və insan alverinin qurbanına çevrilmək təhlükəsi ilə üzləşmiş şəxslərin bir hissəsi ilə işlər davam etdirilir.
