Bakı, Sumqayıt və Abşeron rəqəmli televiziya yayımına keçdi
Noyabrın 1-dən Bakı, Sumqayıt şəhərlərində və Abşeron yarımadasında tam açıq paketli rəqəmli televiziya yayımına keçilib. Rabitə və Yüksək Texnologiyalar Nazirliyi bildirir ki, müasir televizorlar, o cümlədən 2010-cu ildən istehsal olunan bütün televizorlar rəqəmli yayımlanan siqnalları heç bir əlavə qurğu olmadan qəbul edir. Rəqəmli yayımı qəbuletmə imkanı olmayan televizorlar üçün isə dekoderləri (“Set-Top-Box”) istifadə haqda təlimatla birgə poçt şöbələrindən əldə etmək mümkündür. Bakı, Abşeron və Sumqayıt sakinləri bu qurğuları poçt şöbələrindən 22 manat ödəməklə əldə edə bilərlər.
Rəqəmli yayım siqnallarını qəbul etmək üçün xüsusi antenaya ehtiyac yoxdur. Analoq yayım üçün istifadə olunan antena vasitəsilə rəqəmli formatda TV proqramları izləmək mümkündür.
Ölkənin digər ərazilərində tam rəqəmli televiziya yayımına dekabrın 1-dən keçiləcək və analoq yayım dayandırılacaq.
Naxçıvan Muxtar Respublikasında açıq paketli rəqəmli televiziya yayımına 10 dekabr 2014-cü ildən keçilib.
