Mariano Rahoy axır ki, baş nazir oldu
İspaniya Xalq Partiyasının lideri Mariano Rahoy oktyabrın 31-də kral VI Felipenin qarşısında baş nazir kimi and içib. Kral Mariano Rahoyu ötən gün baş nazir təyin edib.
Hökumət qurmaq səyləri 10 aydır nəticə vermirdi. 2015-ci il dekabrın 20-də keçirilmiş parlament seçkisində hakim Xalq Partiyası nisbi qələbə qazanıb. Sosialist Fəhlə Partiyası, Podemos Partiyası, Vətəndaşlar Partiyası seçki yarışında sonrakı yerləri tutublar. 350 yerlik aşağı palatada heç bir partiyanın təkbaşına hökumət qurmaq imkanı olmayıb, koalisiya yaratmaq isə alınmayıb. Bu il iyunun 26-da yeni parlament seçkisi keçirilib, amma heç bir partiya hökumət qurmaq üçün gərəkli olan 176 mandata sahib çıxmayıb.
Novator.az xəbər verir ki, oktyabrın 29-da İspaniya parlamentində Mariano Rahoyun baş nazir təyin olunması səsə qoyulub. 170 deputat onun lehinə, 111 nəfər əleyhinə səs verib. Sosialist Partiyasının 68 deputatı bitərəf qaldığı üçün azlıq hökuməti qurmaq mümkün olub, yeni seçki ehtimalı aradan qalxıb. Hökumətin tərkibi noyabrın 3-də açıqlanacaq.
