“Gürcü arzusu” arzusuna çatdı
Gürcüstanda parlament seçkisinin ikinci turunun nəticələri açıqlanıb. Oktyabrın 30-da 50 dairə üzrə keçirilmiş seçki hakim Demokratik Gürcüstan Partiyasının (“Gürcü arzusu”) qələbəsi ilə yekunlaşıb. Novator.az-ın məlumatına görə, “Gürcü arzusu”nun təmsilçiləri 48 dairədən mandat alıblar. Digər dairələrin birini hakim partiyanın dəstəklədiyi müstəqil namizəd, digərini Bizim Vətən Partiyası udub.
Beləliklə, “Gürcü arzusu” parlamentə 115 mandat qazanaraq həm hökumət qurmaq, həm də ana qanunu dəyişmək imkanı verən konstitusion çoxluq əldə edib.
Seçkinin ilk turu oktyabrın 8-də olmuş, “Gürcü arzusu” 67 mandat, müxalif Vahid Milli Hərəkat Partiyası 27 mandat, millətçi mövqedə dayanan Vətənpərvərlər Alyansı 6 mandat almışdı.
150 yerlik parlamentin 77 deputatı proporsional (partiya siyahıları üzrə), 73 deputatı majoritar (dairələr üzrə) üsulla seçilir. Hökuməti parlamentdə 76 mandat əldə edən partiya formalaşdırır.
